Eastadeaddji gárrenávnnasbargu

Mii plánet, oahpistit ja gárgehit eastadeaddji gárrenávnnasbarggu gielddain ja guovlluin ovttasráđiid eará virgeoapmahaččaiguin, guovlodoaibmiiguin ja organisašuvnnaiguin. Sosiála- ja dearvvašvuođaministeriija jođiha riikaviidosaš eastadeaddji gárrenávnnasbarggu, go fas Dearvvašvuođa ja buresveadjima lágádus oahpista ja gárgeha.

Našuvnnalaš eastadeaddji gárrenávnnasbarggu doaibmanplána ollašuhttá lága eastadeaddji gárrenávnnasbarggu ordnemis. Doaibmaplána sisttisdoallá guhtege guovlohálddahusdoaimmahaga guoski doaibmabiju ja ulbmiliid bargui.

Mii oahpistit ja doarjut eastadeaddji gárrenávnnasbarggu guovlluguovdasaččat. Eastadeaddji gárrenávnnasbargui lea ráhkaduvvon málle, mii vuođđuduvvá guovlluguovdasaš koordinašuvdnii. Das guovlohálddahusdoaimmahagain lea guovddáš rolla.

Guovlohálddahusdoaimmahagat

• oahpistit doaibmaguovlluset eastadeaddji gárrenávnnasbarggu
• plánejit ja gárgehit dan searválagaid eará virgeoapmahaččaiguin ja servošiiguin
• dorjot doaibmaguovlluset gielddaid eastadeaddji gárrenávnnasbarggu ollašuhttimis ja gárgeheamis.

Guovlohálddahusdoaimmahagaid guovddáš oahpisteami ja doarjaga vuogit leat

• gielddain doaibmi kontáktaolbmuid fierpmádaga bajásdoallan
• ovddaldasti bearráigeahčču, oahpisteapmi ja gieldagalledeamit
• guovlluguovdasaš dilledieđuid ja fuopmášumiid čoahkkáigeassin
• ovttasbargočoahkkimat ja skuvlemat.

Juohke guovlohálddahusdoaimmahagas lea njunušdárkkisteaddji, gean oktan bargoguovlun lea eastadeaddji gárrenávnnasbarggu koordineren, oahpisteapmi ja ovddaldasti bearráigeahčču guovllustis. Su doarjjan doaibmá guovlluguovdasaš hálddahusrasttildeaddji bargojoavku, man bargguide gullet eastadeaddji gárrenávnnasbarggu gárgeheapmi, čuovvun ja árvvoštallan sihke guovlluguovdasaš koordinašuvnna doarjun.

Gielddain lea lágas mearriduvvon geatnegasvuohta eastadeaddji gárrenávnnasbarggus. Mii stivret dán ásahuvvon geatnegasvuođa ollašuhttima. Máŋggasuorggat, lihkostuvvan eastadeaddji gárrenávnnasbargu eaktuda doaibmi ráhkadusaid, máhttima, gokčevaš bálvalusaid ja eastadeaddji gárrenávnnasbarggu resursajuolludeami.

Eastadeaddji gárrenávnnasbargu lea gárrenávdnasiid dagahan hehttehusaid eastadeapmi ja geahpedeapmi. Juksanmearrin lea geahpedit gárrenávdnasiid jearaldaga, oažžuma, fállama ja gárrenávnnashehttehusaid. Dasa lassin háliidit ovddidit dearvvašvuođa, dorvvolašvuođa ja buresveadjima.

Eastadeaddji gárrenávnnasbargu guoská alkohola, narkotihkaid, duhpáha ja eará gárremii geavahuvvon ávdnasiid. Ruhtaspealloaddikšuvdna ja eará doaibmaaddikšuvnnat gullet maiddái barggu ollái.