Doavttir
Olbmuin, geat leat vuoigadahtton iešheanalaččat bargat doavttirin, lea vuoigatvuohta mearridit dálkasiid. Sii sáhttet mearridit dálkasiid olbmui medisiinnalaš dárkkuhusa várás sihke pro auctore –dálkkasmearrádusain iežaset ámmáhis bargamii.
Gaskaboddosaččat doaktára doaimmas bargi medisiinna studeanta sáhttá mearridit dálkasiid dušše buohcciide, geaid dikšu.
Bátnedoavttir
Olbmuin, geat leat vuoigadahtton iešheanalaččat bargat bátnedoavttirin, lea vuoigatvuohta mearridit dálkasiid. Sii sáhttet mearridit dálkasiid olbmui dušše bátnemedisiinnalaš dárkkuhusa várás sihke pro auctore –dálkkasmearrádusain iežaset ámmáhis bargamii.
Bátnedoaktáris lea vuoigatvuohta mearridit dálkkasbuktagiid, mat klassifiserejuvvojit aiddonassii narkotihkkan, oktanaga eanemustá logi juohkinovttadaga. Earát go spesiálabátnedoaktárat ožžot mearridit váldoáššis guovddášnearvafierbmái váikkuheaddji dálkasa eanemustá unnimus vuovdinlobálaš báhka.
Gaskaboddosaččat bátnedoaktára barggus doaibmi studeanta oažžu mearridit dálkasiid dušše buohcciide, geaid dikšu.
Buohccedivššár
Lágalažžan dahkkon buohccedivššáris, geas lea doarvái geavada vásáhus, ja gii lea čađahan dasa dárkkuhuvvon lasseskuvlema, lea ráddjejuvvon vuoigatvuohta mearridit su dikšun buohccái apoteaikkas dálkasiid, mat geavahuvvojit dikšumis. Buohccedivššár oažžu mearridit dálkasa, go jearaldagas lea ovddalgihtii eastadeaddji dikšun, doaktára mearridan dálkkadikšuma joatkin dahje dálkkasdikšun, mii vuođđuduvvá buohccedivššára gávnnahan dikšuma dárbui.
Ráddjejuvvon dálkkasmearrideami eaktun lea čálalaš mearrádus, mas logahallojuvvojit dat dálkasat, maid buohccedivššár oažžu mearridit, ja vejolaš ráddjehusat, mat laktásit dálkasiid mearrideapmái. Čálalaš mearrádusa addá vástideaddji doavttir dan doaibmaovttadagas, masa buohccedivššáris lea bálvalusgaskavuohta. Buohccedivššára ráddjejuvvon dálkkasaddinvuoigatvuohta lea doaibmabáikkis gitta.
Ráddjejuvvon dálkkasmearridanvuoigatvuohta lea vejolaš vuođđodearvvašvuođafuolahusa rabasbálvalusain, spesiálabuohccedikšuma poliklinihkain ja eará gieldda dahje gieldaovttastumi ordnenvástui gulli dearvvašvuođafuolahusa bálvalusain. Sosiála- ja dearvvašvuođaministeriija dálkasa mearrideamis addin ásahusa čuvvosis meroštallojuvvojit dálkasat, dávdadilit ja eará ráddjemat, mat leat ráddjejuvvon dálkkasmearrideami olis.
Spesiálagelbbolašvuođa cealkin ohccojuvvo Valviras.
Optihkkár
Optihkkár oažžu mearridit pro auctore –dálkkasmearrádusain apoteaikkas dálkasiid, maid dárbbaša vuostáiváldindoaimmas. Optihkkár ii oaččo mearridit dálkasiid buohcciide. Dálkasat, maid optihkkár sáhttá mearridit, leat meroštallojuvvon sosiála- ja dearvvašvuođaministeriija ásahusa čuvvosis.
Njálbmehygienista
Iehčanas fidnobargin doaibmi njálbmehygienista oažžu mearridit pro auctore –dálkkasmearrádusain apoteaikkas dálkasiid, maid dárbbaša vuostáiváldindoaimmastis. Njálbmehygienista ii oaččo mearridit dálkasiid buohcciide. Dálkasat, maid njálbmehygienista sáhttá mearridit, leat meroštallojuvvon sosiála- ja dearvvašvuođaministeriija ásahusa čuvvosis.