Õõldâskõskkvuõttviõkkvääʹld cõggmõš

Kååʹdd âʹlǧǧe cõggâd õõldâs- da piârkõskkvuõđin šõddi viõkkvääʹld. Vuʹvddvaaldâšmkonttâr pâʹjjtaʹrǩǩeei koordinâstt da ohjjad cõggi viõkkväʹlddtuâj õhttvuõttoummi säimmõõzz. Lääʹddjânnam lij čõnnõõttâm jääʹǩǩted õõldâskõskkvuõtt- da piârviõkkvääʹld cõggmest Euroopp suåvtõõzzâst čuõlmmum Istanbuul suåppmõõžž.

Õõldâskõskkvuõttviõkkväʹldd lij miârkteei meertiõrvâsvuõttčuõlmm, kååʹtt kuõskat pukid õhttsažkåʹddklaassâst, kulttuurâst, ââʹjjest da sooǥǥpeäʹlest huõlǩani. Õõldâskõskkvuõđâst da piârrjest vuäitt očndõõttâd fyyslaž, jiõggsaž, seksuaalʼlaž, jällmõõžž kuõskki, tällõõzzlaž leʹbe digitaalʼlaž viõkkväʹldd leʹbe tõin akkummuš. Huõlteʹmesvuõtt da hueʹneld âânnmõš lie še viõkkväʹldd. 

Sosiaalhuâll-lääʹǩǩ meäʹrtââll õõldâskõskkvuõtt- da piârviõkkvääʹld vueʹǩǩen, koʹst sosiaalkääzzkõõzzid âlgg jäʹrjsted. Õõldâskõskkvuõttviõkkväldda kässjõõttmõʹšše lij nääiʹt nuʹtt vuõiggâdvuõtt ko še õõlǥtemvuõtt. Kooʹddin lij lääʹjjmeâldlaž õõlǥtemvuõtt cõggâd da kässjõõttâd õõldâs- da piârkõskkvuõđin šõddi viõkkväldda.

Meeraikõskksaž suåppmõõžž da Lääʹddjânnam lääʹjjšiõttummuš õõlǥte viõkkvääʹld cõggmõõžž. Määŋgsuârggsaž, oʹnnstam õõldâskõskkvuõttviõkkvääʹld cõggâmtuâjj ooudald toiʹmmjeei rajjsid, silttummuž, riʹjttjeei kääzzkõõzzid da viõkkvääʹld vuâsttsaž tuâj resursâʹsttem. Toiʹmmjeei rajjsi tuejjummšest lij vääžnai tõt, što õõldâskõskkvuõttviõkkvääʹld cõggmõõžž koordinaatio da plaanid siiʹsǩââʹttet vueʹssen väʹlddkååʹdd, vuuʹdi da kooʹddi pueʹrrvââjjam- da staanvuõttplaanummuž. Vuʹvddvaaldâšmkoontâr ohjjad da tuärjjad tän lääʹjjmeâldlaž õõlǥtõõzz teâuddmõõžž.