Dieđáhusat 2023

Lappi gielddain eastadeaddji gárrenávnnasbarggu ráhkadusat leat oppalaččat hedjonan

Guovlohálddahusdoaimmahagat ja DBL čađahedje cuoŋo-miessemánus riikkaviidosaš jearahallama eastadeaddji gárrenávnnasbarggus. Jearahallama bohtosiid mielde Lappi gielddain ráhkadusaid hedjoneapmái lea váikkuhan sode-ođastus, man olis sosiála- ja dearvvašvuođabálvalusat sirdásedje gielddain Lappi buresveadjinguvlui.

Buot Lappi 21 gieldda vástidedje jearahallamii mii kártii gielddaid eastadeaddji gárrenávnnasbarggu dili ja ráhkadusaid.

Jearahallamis bođii ovdan:

  • 76 % Lappi gielddain dahjege 16 gieldda ledje namuhan eastadeaddji gárrenávnnasbarggu oktavuođaolbmo, njeallje gieldda eai lean namuhan oktavuođaolbmo virggálaččat. (2020 oktavuođaolmmoš lei 19 gielddas dahjege 90 % gielddain.)
  • Eastadeaddji gárrenávnnasbarggus vástideaddji doaibmaorgána dahje doaibmaorgána fápmudan máŋggasuorggat bargojoavku lei Lappis namuhuvvon 15 gielddas dahjege 71 %. (2020 vástideaddji doaibmaorgána lei namuhuvvon 18 gielddas dahjege 86 %.)
  • Eastadeaddji gárrenávnnasbarggu geavadis doibmiibiddji máŋggasuorggat bargojoavku mii gokčá buot ahkejoavkkuid, lei 16 gielddas dahjege 76 %. (2020 17 gieldda dahjege 81 %.)
  • Doaibmaplána mii sisttisdoallá eastadeaddji gárrenávnnasbarggu (mas leat buot ahkejoavkkut mielde), lei 16 gielddas dahjege 76 %. (2020 20 gielddas dahjege 95 %.)

Ovdal jagi 2023 gielddain eastadeaddji gárrenávnnasbarggus vástidii sosiála- ja dearvvašvuođalávdegoddi dahje vuođđodorvolávdegoddi. 2023 sode-ođastusa oktavuođas dat heaittihuvvojedje ja sadjái galggai namuhuvvot ođđa vástideaddji doaibmaorgána. Seamma láhkai gieldda oktavuođaolbmo sadjái galggai namuhuvvot ođđa oktavuođaolmmoš.

Jearahallama vuođul gielddat ožžot rávvagiid eastadeaddji gárrenávnnasbarggu ordnemii

Guovlohálddahusdoaimmahat ja Dearvvašvuođa ja buresveadjima lágádus ollašuhtte eastadeaddji gárrenávnnasbarggu jearahallama cuoŋo-miessemánus 2023. Jearahallan čujuhuvvui gielddaid eastadeaddji gárrenávnnasbarggu oktavuođaolbmuide dahje gielddaid eastadeaddji gárrenávnnasbarggus vástideaddjiide. Erenoamážit jerrojuvvui, leatgo gielddat namuhan lágas mearriduvvon eastadeaddji gárrenávnnasbarggus vástideaddji doaibmaorgána, doaibmágo gielddas dahje guovllus eastadeaddji gárrenávnnasbarggu doibmiibiddji máŋggasuorggat bargojoavku, koordinerego namuhuvvon oktavuođaolmmoš eastadeaddji gárrenávnnasbarggu ja mo eastadeaddji gárrenávnnasbargu lea heivehuvvon oassin gielddaid doaibmama plánema.

Jearahallanbohtosat veardiduvvojedje ovddit 2020 dahkkon jearahallamii. Bohtosiid vuođul ja lassin našuvnnalaš neavvagiidda doarjalemiin raporttas addojuvvojit gielddaide evttohusat eastadeaddji gárrenávnnasbarggu ollašuhttimii ja nannemii.

Loga lasi jearahallama bohtosiin

Mediai

Sanna Ylitalo 
Njunušdárkkisteaddji 
Lappi guovlohálddahusdoaimmahat 
0295 017 386
[email protected]

Dieđáhusat 2022

Meahccebivdu ráddjejuvvo Anára, Soađegili, Sállá, Posio ja Roavenjárgga gielddaid áhpásmahttin- ja turismaguovlluin

Lappi guovlohálddahusdoaimmahat leat Meahciráđđehusa ohcamuša geažill gieldán báhčinvearjjuiguin meahccebivddu viđa jahkái ráddjenguovlluin, mat leat čuovvovaš guovlluin:

1) Anár: Anára vánddardanguovlu, Juvduvárri, Huáššiváári (Kortevaara), Juvdujoga gáddeguovllut váldogeainnu 75 oarjjabealde Čevrisnjeeri (Saukkoniva) rádjai.
2) Anár ja Soađegilli: Suoločielgi, Laanila, Gilonoaivi ja Urho Kekkonen álbmotmeahcci, turismaguovddáža lagašguovlu ja dan vánddardanmáđijat.
3) Roavenjárga: Napapiiri vánddardanguovlu, Vikaköngäs ja Vaattunkivaara, Vaattunkiköngäs ja Könkäänsaari.
4) Sállá: Sálláduoddara turismaguovddáža lagašguovlu.
5) Posio: Riisitunturi álbmotmeahci beaivemáđijaid lagašguovlu. 

Mearrádus lea dahkkon 28.1.2022 meahcástanlága 23 paragráfa vuođul. Meahcástanráddjehusat leat fámus 4.2.2022-3.2.2027.

Guovllut leat bivnnuhis galledančuozáhagat ja daid galledeaddjimearit leat lassánan maŋimuš jagiid áigge mearkkašahttiláhkái. Meahccebivddu ráddjen dáid guovlluin lea almmolaš dorvvolašvuođa geažil earenoamáš dehálaš, ja danin báhčinvearjjuiguin meahccebivddu leat mearridan gieldit dihto spiehkastagaiguin Meahciráđđehusa ohcamuša mielde.

Spiehkastagat gildosii

Gielddus ii guoskka

  • ealggavuojeheami beatnagiiguin dahje vuojehanalbmáiguin
  • smávvafuođđuid rihtá- dahje báhcahatbivddu iige dan oktavuođas heakkahuhttinvearjju atnima
  • guovllus bážas fuođđu vuohttima dahje heakkahuhttima

Lobálaš lea ain maiddái stuorraspiriid vahágii vuođđuduvvi spiehkastatlohpebivdu Suoma Fuođđoguovddáža meahcástanlága 41 paragráfa vuođul mieđihan spiehkastatlobi mielde.

Ráddjenguovllut leat merkejuvvon kártačuvvosiidda 1 - 5, mat leat mearrádusa čuovusin. 

Lassedieđut

Lappi guovlohálddahusdoaimmahaga mearrádus 28.1.2022

Kártačuvvosat ráddjenguovlluin 

Mediai
njunušdárkkisteaddji Saana-Kaisa Ylitalo, tel. 0295 017 367, Lappi guovlohálddahusdoaimmahat, [email protected]

Dieđáhusat 2020

Lappis badjel 50 olbmo álbmotdilálašvuođain ja almmolaš čoahkkimiin galgá ain sihkkarastit dorvogaskkaid doarvái hygieniija njoammundávdadili vearráneami ovddalgihtii eastadeapmin. Skábmamánus eanagotti guovllus joatkašuvvá golggotmánnui addojuvvon čoahkkananráddjehus.

Lappi guovlluhálddahusdoaimmahat seailluhii ovddežis njoammundávdalága čuvvon mearrádusas čoahkkananráddjehusain Lappis.Njoammumiid leavvama ovddalgihtii eastadeapmin sáhttá badjel 50 olbmo álbmotdilálašvuođaid ja almmolaš čoahkkimiid ordnet siste ja guvllolaččat ráddjejuvvon olgodiliin dalle, go dáhpáhusa ordnejeaddji bastá sihkkarastit oassálastiid dorvvolašvuođa.

Dáhpáhusa dorvvolašvuohta sihkkarasto čuovvumiin Dearvvašvuođa ja buresveadjima lágádusa sihke oahpahus-ja kulturministeriija 21.9.2020 addán rávvaga. Rávvagis gáibidit earret eará, ahte:

  • oassálastiid dahje joavkkuid gaskii galgá dorvvastit vejolašvuođa1-2 mehtera dorvogaskka bajásdoallamii.
  • diliin, main sáhttet šaddat ráiddut, olbmuid galgá muittuhit ja veahkehit dorvogaskkaid doallamis.
  • ordnejeaddjiide galgá addit rávvagiid dorvogaskkain ja buori giehtahygieniijas ja fállat vejolašvuođa gieđaid buhtisteapmái.

Lappi guovlluhálddahusdoaimmahaga mearrádus guoská Eanodaga, Anára, Giema, Giemajávrri, Gihttela, Kolari, Muoná, Pelkosenniemi, Pello, Posio, Ranua, Roavvenjárgga, Salla, Suovvaguoikka, Simo, Soađegili, Tervola, Durdnosa, Ohcejoga ja Badjedurdnosa gielddaid.Mearrádus boahtá fápmui 1.11.2020. Njoammundávdalága mielde mearrádus sáhttá leat fámus eanemustá mánotbaji áigge.

Lappis dávdadilli lea ráfálaš

Lappi guovlluhálddahusdoaimmahat váldá vuhtii mearrádusa dagadettiin Lappi guvllolaškoordinerenjoavkku árvvoštallama guvllolaš koronaepidemiija dilis ja ávžžuhusain dustendoaimmaide.

Lappi guovlluhálddahusdoaimmahaga doaibmaguovllus dávdadilli lea ráfálaš. Guovtti vahku covid-19-dáhpáhusaid ihtin lea molsašuddan gaskkas 8,3-21,5 dáhpáhusa 100000 ássi guovdu ovddit mánotbaji áigge.

Dilli Lappis sáhttá goittotge rievdat johtilit. Stuorát dáhpáhusaide boahtit dávjá sierra guovlluin riikka. Skábmamánus johtima Lappi guvlui lasihit dálvesiivvut ja máŋggat dálveaktiviteahtat. Čavčča áigge Suomas leamašan máŋggat viidát leavvan njoammungollosat, mat leat vuolgán ovdamearkan buđaldusdoaimmain dahje earálágan priváhta dahje almmolaš dilálašvuođain.

Jus hygieniija-ja dorvvolašvuođarávvagiid čuovvuma eai fuolat de sáhttet olbmot joavkun šaddat dávdda vullošažžan. Epidemiijadili goahcamii lea dehálaš, ahte juohkehaš dáhpáhusa ordnejeaddji ja ovttaskas olmmoš doaibmá vásttolaččat.

Čavgadut čoahkkananráddjehusat leat vejolaččat

Jus njoammundávdadilli vearrána Lappis fáhkkestaga, ieš guhtege gielda sáhttá mearridit báikkálaš čoahkkananráddjehusain, mat leat guovlluhálddahusdoaimmahaga mearridan čoahkkananráddjehusaid čavgadeabbo. Gieldda njoammundávddain vástidan doaibmaorgána sáhttá mearrádusainis maiddái giddet lanjaid ja addit ávžžuhusaid vuoigŋansujiid geavaheamis ja priváhtadilálašvuođaid. Maiddái buohccedikšunbire sáhttá addit earálágan ávžžuhusaid. Jus čavgadut ráddjehusat leat dárbbašlačča máŋgga gieldda dahje olles eanagotti guovllus, de guovlluhálddahusdoaimmahat sáhttá mearridit dušše čoahkkananráddjehusain ja skuvllaid giddemis.

Lassedieđut:
Mearrádus golggotmánu čoahkkananráddjehusain, LAAVI 22.10.2020
 

Dáhpáhusa ordnejeaddjiid rávven tel. 0295 016 666 (vu-bedmu8-11.30 ja 12.30-16), šleađgapoasta: [email protected]

Dávjá jerrojuvvon jearaldagat (avi.fi), ovdamearkkat:

-Gosa sáhttá almmuhit, jus áicá stuorra álbmotjoavkkuid dahje ráddjehusain beroškeahtes doaimma?

-Makkár álbmotdilálašvuođaid ja čoahkkanemiid guovlluhálddahusdoaimmahaga addán mearrádusat gusket?

-Sáhttágo guovlluhálddahusdoaimmahat mearridit buđaldusdoaimma gaskkalduhttot koronadili dihtii?

Dearvvašvuođa ja buresveadjima lágádusa ja oahpahus-ja kulturministeriija ráva koronavirusnjoammumiid eastadeapmin,21.9.2020 (minedu.fi)

Mediaoktavuođadieđut
Guovlluhálddahusalladoavttir Sari Kemppainen,telefon 0295 017350
[email protected]
Lappi guovlluhálddahusdoaimma